Si Arsobispo Gabriel M. Reyes natawo niadtong Marso 24, 1892 sa Kalibo, Capiz (karon Aklan.) Sa edad nga 13 misulod siya sa Seminaraio de San Vicente Ferrer sa Jaro, Iloilo, ug niadtong Marso 27, 1915 giordenahan nga pari sa Obispo sa Jaro, Obispo Dennis Dougherty, nga sa ngadto-ngadto nahimong cardinal-arsobispo sa Philadelphia, USA.
Nadestino siya nga coadjutor sa katedral sa Jaro ug sa wala magdugay nahimong kura niini. Apan nabalhin siya sa Balasan isip kura paroko sa samang tuig, ug giugmad niya ang maong parokya nga niadtong panahona gidagsang sa daghang mga Aglipayan ug Protestante. Sa 1918 nabalhin siya sa Capiz (karon Roxas City), Capiz, ug sa Hulyo 20, 1920 natudlo siyang Chancellor sa Dyosesis sa Jaro ug Sekretaryo sa Obispo, nga niadtong panahona mao na si Obispo James McCloskey. Sa samang higayon siya ang kura sa Sta. Barbara. Sa 1927 nahimo siyang Vicario General sa dyosesis.
Niadtong Oktubre 11, 1932 si Monsignor Gabriel Reyes natudlo nga Obispo sa Sugbo; ang iyang ordenasyon sa episkopasiya gihimo didto sa Katedral sa Jaro. Pagka Oktubre 13 giinstalar siya nga Obispo sa Sugbo, puli sa unang Pilipinhong Obispo dinhi, ang Sugboanong si Obispo Juan Gorordo.
Ug sa makasaysayanong Abril 28, 1934, human sa kapin sa 300 ka tuig nga pagka dyosesises, ang Sugbo gituboy nga usa ka artsidyosesis ni Papa Pio XI, ug si Msgr. Gabriel M. Reyes mao ang unang arsobispo niini. Niadtong panahona ang Artsidyosesis sa Sugbo, nga nagdala sa titulong ecclesiastical nga Santisimo Nombre de Jesus, nagsakop sa mga suffragan dioceses sa Jaro (1865), Calbayog (1910), Bacolod (1932), ug Cagayan de Oro (1933).
Niadtong panahona sakop pa sa Sugbo ang isla sa Bohol, nga sa ngadto-ngadto nahimong buwag nga dyosesis sa Tagbilaran (1941), diin ang unang obispo niini mao si Msgr. Julio R. Rosales, nga sa kaulahiay nahimong arsobispo sa Sugbo puli ni Arsobispo Reyes niadtong 1949, ug natuboy nga usa ka cardinal sa 1969. (Sa 1986 gitukod ang laing dyosesis sa Talibon.)
Sa iyang pagka arsobispo gigugol ni Msgr. Reyes ang iyang kusog ug kahago sa pag-ugmad sa mga institusyon sa lokal nga Simbahan ug sa paghatag og pagtagad nga pastoral sa mga matuohong Sugboanon.
Aron pagpauswag sa pagpanudlo sa mga doktrina sa Simbahan ug pag-atbang sa mga propaganda sa ubang mga tinuohan, gitukod niya ang sinemanang mantalaan sa artsidyosesis, ang Lungsuranon, nga mipagawas sa unang hulad niini niadtong Septiyembre 9, 1934. (Karong tuiga saulogon usab sa Artsidyosesis sa Sugbo ang bodas de diamante sa pagka-tukod niini.) Gawas sa maong mantalaan, mipakita usab siya og pag-ila sa kamapuslanon sa mass media sa buhat sa ebanghelisasyon pinaagi sa pagpasiugda og radio program nga “Catholic Hour” sa kanhi estasyon DZRC.
Gipalambo niya ang programang “Catholic Action” ingon man ang katesisismo sa kabataan ug ang pagtukod og Association of the Propagation of Faith sa mga parokya. Gimando niya ang papasiugda og mga eucharistic congresses sa mga parokya agig pagpangandam sa International Eucharistic Congress sa Manila sa 1937. Usa sa dakong kalihokan nga gipahigayon sa iyang panahon mao ang pagpatawag sa Third Diocesan Synod of Cebu niadtong Hulyo 27-29, 1937 diin gipahaum ang mga probisyon sa Canon Law sa 1918 sa lokal nga sitwasyon. Gipalambo usab niya ang Adoracion Nocturna, gipadak-an ang Asilo de la Medalla Milagrosa (1940), ug gipatukod ang usa ka hospital alang sa mga kabus, ang Holy Child Hospital nga wala na karon.
Sumala pa, si Arsobispo Reyes personal usab nga mipahigayon og mga santos ehersisyos alang sa mga ordinaryong mamumuo nga tambongan sa daghan. Ug atol sa iyang pagdumala nga natukod usab ang mga parokya sa Guadalupe, Tabuelan, Simala sa Sibonga ug Sta. Lucia sa Asturias.
Apan nasinati ni Arsobispo Reyes ang dakong kasakitan sa dihang miulbo sa nga Ika-duhang Gubat sa Kalibotan sa 1941, nga miguba sa daghang mga struktura sa artsidyosesis, nag-una niini ang Katedral sa Sugbo nga sa 1940 iya untang gipaanindot atol sa pagtimaan sa iyang ika-25 nga anibersaryo sa pagka-obispo. Sa paglinaw na, giatubang niya ang dakong trabaho sa rekonstruksyon. Gisugdan niya pagpabangon ang katedral nga nahiagum og dakong kadaut gumikan sa pagpamomba sa mga Amerikano atol sa gubat sa liberasyon sa Sugbo, gibalhin niya ang palasyo sa arsobispo sa kasamtangang nahimutangan karon gikan sa karaang luna niini atbang sa katedral, ug gibalhin usab ang seminario gikan sa pwesto niini duol sa Plaza Independencia ngadto sa Mabolo.
Taliwala sa iyang paningakmot sa pagpabarog sa artsidyosesis human sa gubat, gibalhin siya sa Manila isip Coadjutor Arsobispo niini niadtong 1949. Ug sa kamatayon sa Amerikanong arsobispo, Arsobispo Michael O’Doherty, gitudlo siya ni Papa Pio XII nga labing unang Pilipinong arsobispo sa Artsidyosesis sa Manila Septiyembre 29, 1949.
Sa iyang hamiling pagpangalagad sa duha ka labing dagkong artsidyosesis sa nasud, nabatonan niya ang mga distinksyon nga unang Arsobispo sa Sugbo, unang Pilipinong Arsobispo sa Manila, ug predesesor sa duha ka unang mga cardinal sa Pilipinas, Rufino J. Cardinal Santos sa Manila, ug Julio R. Cardinal Rosales sa Sugbo.
Namatay si Arsobsipo Gabriel M. Reyes niadtong Oktubre 10, 1952.
(Main Source: Bishops of Cebu by Msgr. Angel N. Lagdameo, 1986)
Comments